လွမ်းမောမိသည့် နေ့ရက်လေးများ ( ၈ )

   မဟာပရိနိဗ္ဗာနစေတီတော်မှတဆင့် မနီးမဝေးမှာ တည်ရှိတဲ့ဘုရားရှင် နောက်ဆုံးရေသပ္ပါယ်ခဲ့တဲ့နေရာကို သွားရောက်ကြပါတယ်၊ ဘုရားကျောင်း ဆောင် ဆောက်လုပ်ထားပြီး ဈာနမုဒြာခေါ်ဈာန်ဝင်စားဟန် ထိုင်တော် မူရုပ်ပွားတော်မြတ် သီတင်းသုံးပါတယ်၊ အေဒီ၁- ရာစု ကနိသျှခေတ် လက်ရာဖြစ်ပြီး ဥာဏ်တော် ၅-ပေ ၆-လက်မရှိပါတယ်။ 

    ထိုမှတဆင့် ဘုရားရှင်ရဲ့ ရုပ်ကလာပ်တော်ကို မီးပူဇော်တဲ့နေရာမှာ တည်ထားတဲ့ စေတီတော်ကြီးကို သွားရောက်ဖူးမျှော်ကြပါတယ်၊ ရုပ်ကလာပ်တော် တေဇောဓာတ် လောင်ကျွမ်းပြီးတဲ့နောက်ကျန်ရစ်တဲ့ မီးသွေးများကို ဌာပနာပြီး စေတီတည်ထားတာမို့ အင်္ဂါရ(မီးသွေး)စေတီလို့ ခေါ်ကြပါတယ်၊ မလ္လမင်းတို့ရဲ့ ဦးသျှောင်ထုံးတဲ့ နေရာမှာတည်ထားတဲ့ စေတီဖြစ်လို့ မကုဋဗန္ဓနစေတီ(မကုဋ=ဦးသျှောင်၊ဗန္ဓန-ထုံးဖွဲ့ခြင်း)လို့လည်း ခေါ်ကြပါတယ်၊ ဒီစေတီတော်ကြီးကို မိမိတို့ရောက်တော့ တော်တော် မှောင်နေပါပြီ၊ ဘုရားရှင်ရဲ့ ဂုဏ်တော်တွေကို ရွတ်ဖတ်ပူဇော်ကြ မှတ်တမ်းတင် ဓာတ်ပုံရိုက်ကြပြီး တည်းခိုရာဟိုတယ်ကို ပြန်လာကာ အနားယူအိပ်စက်ခဲ့ကြပါတယ်။
   နောက်တစ်ရက်မှာ စောစောလေးထပြီး လုမ္ဗိနီကို ခရီးဆက် ကြပါတယ်။ နေ့ဆွမ်းအမှီ ရောက်တယ်လို့ပြောကြတဲ့အတွက် ဆွမ်းကို ထုပ်မယူဖြစ်တော့ပါဘူး၊ အိန္ဒိယနယ်စပ်ကိုရောက်တော့ တော်တော်ကြီးတဲ့ ကျွန်းတောကြီးကို ဖြတ်ကြ ရတယ်၊ မျောက်တွေကလည်း ပေါမှပေါပဲ။ ကားရပ်ပြီး အစားအစာကျွေးရင် လူကို အန္တရာယ်ပြုတတ်တယ်လို့ သိရတဲ့အတွက် ကားပေါ်ကနေပဲ ငှက်ပျောသီးတွေ ပစ်ကျွေးကြတယ်။
     နီပေါ အိန္ဒိယနယ်စပ် ဖြတ်ကျော်ခ အဖြစ် အသွားအပြန် အိန္ဒိယ ရှုပီး (၂၀၀၀)ပေးရတယ်၊ လုမ္ဗိနီမှာရှိတဲ့ မြန်မာကျောင်းကို နေ့ဆွမ်းအမှီပဲ ရောက်ရှိတယ်၊ နေ့ဆွမ်းစားအပြီး ခဏနားကာ ကပိလ၀တ္ထုမြို့တော်ဟောင်း နေရာကို သွားရောက်လေ့လာကြတယ်၊ မြို့တော်ဟောင်းနေရာဟာ လုမ္ဗိနီမှ အနောက်မြောက်(၁၀)မိုင်ခန့် ဝေးပြီး တောကျကာ လူပြတ်ပါတယ်၊ တစ်ခါတစ်ရံ လုယက်တတ်တယ်လို့ သိရပါတယ်၊ ဒါကြောင့် မိမိတို့လိုပဲ private လာရောက်ကြတဲ့ စင်္ကာပူက မအေးတို့ အဖွဲ့နှင့် အတူ သွားရောက်ကြပါတယ်၊ ဒီနေရာဟာ ဒီနေ့ခေတ်မှာတော့ နီပေါနိုင်ငံ တောလိဝှါမြို့နယ်မှာ တည်ရှိပြီး ပဒရီးယားလို့ ခေါ်ကြပါတယ်။
     ကပိလရသေ့ရဲ့ သင်္ကန်းကျောင်းနေရာမှာ တည်ထားတဲ့ မြို့တော် ဖြစ်တာမို့ ကပိလ၀တ္ထုမြို့လို့ အမည်တွင်တာပါ၊ မြတ်စွာဘုရားရဲ့ ဖခမည်းတော် သုဒ္ဓေါဓနမင်းကြီး နန်းစိုက်ခဲ့ပြီး ဘုရားအလောင်းတော် သိဒ္ဓတ္ထမင်းသား ဒေ၀ဒဟတိုင်းသူ ယသော်ဓရာ နှင့် လက်ဆက်ကာ ၁၆-နှစ်သားမှ ၂၉- နှစ်သားအထိ ထီးနန်းစည်းစိမ် စံစားခဲ့တဲ့ မြို့တော် ဖြစ်ပါတယ်။ ၀ိဋဋူဘမင်းသား ဘုရင်ဖြစ်လာတဲ့အခါ ကျွန်မသားလို့ စော်ကားခံရတာကို ရန်ငြိုးထားပြီး အမျိုးဖြုတ် သတ်ဖြတ်နှိမ်နှင်းခဲ့တာမို့ သာကီဝင်မင်းမျိုး ပျောက်ခါနီး အထိ ဖြစ်ခဲ့ရတာပါ။
     မြို့တော်ဟောင်းနေရာမှာ ဗောဓိပင် သစ်ပင်ကြီးတွေ ကြီးကြီး မားမားတွေ မြင်တွေ့ရပါတယ်၊ ဒီအပြင် အနောက်ဘက်ဂိတ်နေရာ နန်းတော်ဟောင်းနေရာ ဘုရားအလောင်းတော်တောထွတ်ခဲ့တဲ့ အရှေ့ တံခါးမုခ်တို့ကိုလည်း မြင်တွေ့ ရပါတယ်။ တောထဲမှာ ဖြစ်နေပေမဲ့ ရှေးဟောင်းအမွေအနှစ် နေရာအဖြစ် နီပေါအစိုးရက တန်ဖိုးထားကာ သိမ်းဆည်းထားပုံ ရှိပါတယ်။

  မြို့တော်ဟောင်းနေရာမှ တဆင့် ဖခင်သုဒ္ဓေါဓနမင်းကြီးနဲ့ ဆွေတော် မျိုးတော်များဆောက်လုပ်လှူန်းခဲ့တဲ့     နိဂြောဓာရုံကျောင်းနေရာကို လေ့လာ ကြတယ်၊ နိဂြောဓသာကီဝင်မင်းသားရဲ့ ဥယျာဉ်နေရာမှာ ဆောက်လုပ်ခဲ့တဲ့ ကျောင်းဖြစ်တာမို့ နိဂြောဓာရုံကျောင်းလို့ အမည်တွင်ခြင်းပါ၊ ဘုရားရှင်ဟာ မာန်မာန ကြီးမားလှကြတဲ့သာကီဝင်မင်းမျိုးတို့ရဲ့ မာန်မာနကို ကျစေ လိုတဲ့အတွက် တန်ခိုးပြဋိဟာ ပြတော်မူပြီး စိုစေသူကို စိုစေပြီး မစိုစေသူကို လုံးဝမစိုစေတဲ့ ပေါက္ခရ၀ဿမိုး ရွားသွန်းဖြိုးစေကာ ဒီကျောင်းတော်မှာပဲ ဝေဿန္တရာဇာတ်ကို ဟောတော်မူခဲ့ပါတယ်။
   ဒီကျောင်းတော်မှာ ဘုရားရှင် (၁၅)၀ါမြောက် ၀ါကပ်တော်မူခဲ့တယ်၊ ညီတော်နန္ဒနှင့် သားတော် ရာဟုလာတို့ ရဟန်းပြုခဲ့ကြတယ်၊ တရားဒေသနာ များစွာကို ဟောကြားခဲ့ပါတယ်။ အရင်က ဖြစ်ရပ်ပေါင်းစုံခဲ့တဲ့ ကျောင်းတော် ကြီးဟာ ယနေ့ချိန်မှာတော့ ကျောင်းဆောင်ဟောင်း တစ်ဆောင်ပဲ တွေ့ရ ပါတယ်၊ ကျောင်းဝိုင်းတစ်ဝိုင်းလုံး သရက်ပင်တွေ ဝေေ၀ဆာဆာနှင့် သာသာယာယာရှိလှပါတယ်။

                                                                                         သိမ်မွေ့ဦး (BHU)