လွမ်းမောမိသည့် နေ့ရက်လေးများ ( ရ )

       တည်းခိုမဲ့ အတိထိနိဝါသဟိုတယ်မှာ အခန်းယူကြပြီးတစ်နာရီလောက် အနားယူကြတယ်၊ ရေမိုးချိုးကာ အပန်းဖြေကြပြီး တဲ့နောက် ဘုရားရှင် မဟာပရိနိဗ္ဗာန်ဝင်စံရာ နေရာမြတ်ကို သွားရောက်ဖူးမျှော်ကြတယ်၊ ဦးစွာ မဟာနိဗ္ဗာနစေတီတော်ဘေးက ဘုရားရှင်ကျောင်းတော်ရာမှာ သီတင်း သုံးတဲ့ ပရိနိဗ္ဗာန်ပြုတော်မူဟန် ရုပ်ပွားတော်မြတ်ကို ၀င်ရောက် ဖူးမျှော်ကြတယ်၊ လက်ရာဟာ သက်ရှိထင်ရှားဘုရားရှင် ပရိနိဗ္ဗာန် စံဝင်သကဲ့သို့ အသက်ဝင် ပီပြင်လှပါတယ်၊ အေဒီ ၅-ရာစုက မဟာဝိဟာရ ကျောင်းနေ ဟရိဗလ ရဟန်းတော်ရဲ့ ကောင်းမှုဖြစ်ပြီး မထုရာပြည်သား ဒိနာဆိုသူက ထုလုပ်ထားတာဖြစ်ပါတယ်၊ ညောင်စောင်းရဲ့ ရှေ့မျက်နှာမှာ ဆရာဇီဝကပုံ၊ အရှင်အာနန္ဒာပုံ၊ သုဘဒ္ဒရဟန်းပုံတို့ကို ပုံသေးလေး တွေအနေနဲ့ ထုဆစ်ထားပါတယ်။

    ဤပရိနိဗ္ဗာန်ပြုတော်မူဟန် ရုပ်ပွား တော်မြတ်ကို ဖူးမြှင်ကြပြီး စိတ်မခိုင်သူဘုရားဖူးတစ်ချို့ဟာ ငိုကြွေး လေ့ရှိကြပါတယ်၊ ဦးသိရိန်က ဗွီဒိယို မှတ်တမ်းတင်တာကြောင့် မိမိလည်း မဟာပရိနိဗ္ဗာနသုတ်တော်ကို ကြည်ညိုစွာ ပြောပြ ပူဇော်ဖြစ်ပါတယ်၊ ဘုရားရှင်ရဲ့ ’ဟန္ဒ ဒါနိ ဘိက္ခဝေ အာမန္တယာမိ ဝေါ၊ ၀ယဓမ္မာ သင်္ခါရာ၊ အပ္ပမာဒေန သမ္ပာဒေထ။‘ ဆိုတဲ့ နောက်ဆုံး စကားတော်ကိုလည်း ပွားများဆင်ခြင်ကာ သံဝေကာ ဖြစ်မိကြတယ်။
        မြတ်ဗုဒ္ဓ ပရိနိဗ္ဗာန်ပြုတော်မူတဲ့နေရာမှာ တည်ထားတဲ့ မဟာပရိနိဗ္ဗာနစေတီတော်ကိုလည်း လက်ယာရစ်ပတ်ကာ ပူဇော်ကြတယ်၊ စေတီတော်ကြီး ကို အလုံးအ၀န်းပုံသဏ္ဌန်တည်ထားပြီး ထုံးဖြူသင်္ကန်း ကပ်လှူထားပါတယ်၊ စေတီဒါယကာကို အတိအကျ မသိရဘဲ အဆင့်ဆင့်ထပ်ကာထပ်ကာ တည်ဆောက်ပြုပြင်ခဲ့ကြပါတယ်၊ တစ်ချို့ကတော့ ဟူယင်ဆန် မှတ်တမ်း များအရ အသောကမင်းကြီး တည်ထားတယ်လို့ ဆိုကြပါတယ်၊ ခေတ်အဆက်ဆက် ပြန်လည်ပြုပြင်ခဲ့ရာမှာ မြန်မာတို့ရဲ့ ကုသိုလ်လဲ အထင်ကရ ပါဝင်ခဲ့ပါတယ်။

     စေတီတော်ကြီးကို ကျောက်စာဌာနက ထွင်းဖောက်ရှာဖွေပြီးတဲ့နောက် ၁၉၁၂-ခုနှစ်မှာ ဟင်္သာတမြို့သား ဦးဖိုးကျားက ပြန်လည်ပြုပြင် တည်ဆောက်ခဲ့ပါတယ်၊ ဥာဏ်တော်အမြင့် ၁၆၇-ပေရှိပြီး ထိုခေတ်က ရှုပီးငွေ ၁၈၀၀၀-ကုန်ကျခဲ့ပါတယ်၊ ၁၉၂၇-ခုနှစ်မှာ ထီးတော်တင်လှူခဲ့ပြီး ထီးတော်အတွက် ရှုပီးငွေ ၁၁၁၀၀- ကုန်ကျခဲ့တယ်၊ အဲဒီအချိန်က ထီးတော်ကို နေရောင်ဟတ်တဲ့ အခါ ရွှေရောင်တလက်လက် တောက်ပနေတာကို ဖူးမျှော်နိုင်ခဲ့ကြတယ်၊ နောက်ပိုင်း ငလျင်ဒဏ်ကြောင့် ထီးတော်ကြီးလဲ မြေခခဲ့ရတယ်လို့ သိရပါတယ်။ စေတီတော်ကြီးရဲ့ ပတ်လည် ၀န်းကျင် မှာတော့ ကျောင်းတော်ရာဟောင်းအုပ်ခုံများ၊ ရဟန္တာဓာတ်တော် ဌာပနာသည့် စေတီငယ်များကို ဖူးတွေ့ရပါတယ်။
     ယနေ့ခေတ်မှာတော့ ဒီနေရာဟာ ကုရှိနာဂါရ် လို့ခေါ်တဲ့ ရွာငယ်လေး တစ်ရွာပါ၊ ဘုရားရှင်ခေတ်ကလဲ စည်ကားတဲ့ မြို့ကြီးတစ်မြို့တော့ မဟုတ်ခဲ့ပါဘူး၊ နောက်ဆုံးသာဝကဖြစ်တဲ့ သုဘဒ္ဒပရိဗိုဇ်ကို တရားရေအေး တိုက်ကျွေးတော်မူလိုခြင်း၊ မဟာသုဒဿန စကြာဝတေးမင်းကြီးဘ၀က ကုသာဝတီနေပြည်တော်ဖြစ်ခဲ့ခြင်း၊ ဓာတ်တော်များကို ဒေါန ပုဏ္ဏားက ဖြန့်ဖြေ၍ ဝေဖန်အပ်သော အကြောင်းရှိခြင်း၊ အတိတ် ခုနှစ်ဘ၀က ဦးခေါင်းချခဲ့တဲ့နေရာဖြစ်ခြင်းစတဲ့ အကြောင်းတွေကြောင့် ဒီတောမြို့လေးမှာ ပရိနိဗ္ဗာန်ပြုခဲ့တာပါ၊ မိမိအနေနဲ့ ဒီနေရာကို ဘုရားဖူးရောက်တာ သုံးခေါက်ရှိပါပြီ၊ ရောက်တိုင်းလဲ ဘုရားရှင်ပရိနိဗ္ဗာန်ပြုခဲ့တဲ့ နေရာပါလား ဆိုတဲ့ အသိနဲ့ ၀မ်းနဲသလို ခံစားရပါတယ်၊ ဘုရားရှင် ပရိနိဗ္ဗာန်စံတော်မူခါနီး မိန့်တော်မူခဲ့တဲ့ တရားစကားတော်ကို အမှတ်ရမိတယ်။
      အချိန်ကား မဟာသက္ကရာဇ် ၁၄၈-ခုနှစ်၊ ကဆုန်လပြည့်၊ အင်္ဂါနေ့။ ဘုရားရှင်ဟာ ပရိနိဗ္ဗာန်ပြုခါနီး မလ္လမင်းတို့ရဲ့ အင်ကြင်း ဥယျာဉ်အတွင်း အင်ကြင်းပျိုအစုံတို့၏အလယ် ခင်းထားအပ်တဲ့ ညောင်စောင်းထက်မှာ မြောက်အရပ်ကို ဦးခေါင်းပြုပြီး လျောင်းစက်တော် မူပါတယ်၊ လက်ယာခြေပေါ်မှာ လက်ဝဲခြေကို အနဲငယ်လွန်စေကာ တင်ထားပြီး သတိရှိ ဆင်ခြင်လျက် မြတ်သော လျောင်းစက်ခြင်းကို ပြုတော်မူပါတယ်၊ အင်းကြင်းပင်အစုံတို့ဟာ အခါမဲ့ပွင့်တဲ့ ပန်းတွေဖြင့် ပင်လုံးကျွတ် ပွင့်နေကြတာပါ၊ ဘုရားရှင် ကိုယ်ပေါ်သို့ ပန်းတို့ကို ကြဲဖြန့် နေပါတယ်၊ မန္ဒာရ၀(ထင်ရှားပန်း) တွေကလည်း ကောင်းကင်မှ ကျလာနေပါတယ်၊ နတ်မှာဖြစ်တဲ့ စန္ဒကူးနံ့သာမှုန့် တို့ဟာလည်း ကောင်းကင်မှ ကျလာနေပါတယ်၊ နတ်တူရိယာတို့ တီးမှုတ်ကြပြီး နတ်သီချင်းတွေလည်း သီဆို ပူဇော်နေကြပါတယ်။

      ဒီလို အထူးထူးသော အချင်းအရာတွေနဲ့ ပူဇော်နေတာကို သိတဲ့ ဘုရားရှင်က ‘ဤကဲ့သို့ ပူဇော်ခြင်းသည် အကောင်းဆုံးပူဇော်ခြင်း မဟုတ်သေး၊ တရားနှင့် လျော်စွာ ကျင့်ကြံနေထိုင်မှအမြတ်ဆုံးပူဇော်ခြင်းဖြင့် ပူဇော်သည်မည်၏’လို့ မိန့်တော်မူခဲ့ပါတယ်၊ ဒီတရားတော်ကို သတိရမိ သည်နှင့် တစ်ပြိုင်နက် မိမိရော အမြတ်ဆုံး ပူဇော်ရာရောက်ဖို့ ဘယ်လောက်ထိကျင့်ကြံနေပြီလဲလို့ မ၀ံ့မရံ မေးမိပါသေးတယ်။

                                             သိမ်မွေ့ဦး (BHU)