စီစဉ်သူ၏ မုဒိတာစကား
ဤစာတမ်းဖတ်ပွဲကို အိန္ဒိယနိုင်ငံ၊ ဗာရာဏသီမြို့ တက္ကသိုလ် အသီးသီးတွင် ပညာဆည်းပူးနေကြသော မြန်မာကျောင်းသား ရဟန်းတော်များ ဆုံဆည်းကြသည့် အမှတ်တရ မိတ်ဆုံပွဲ တစ်ပွဲ ဖြစ်စေရန်၊ ပညာသင် ကျောင်းသားတို့၏ လွတ်လပ်သော အတွေးအခေါ်တို့ကို ထေရ၀ါဒနှင့် ဆန့်ကျင်မှု မရှိဘဲ ပွင့်လင်းစွာ ဖော်ထုပ်ပြနိုင်ရန်၊ နိုင်ငံတကာပွဲများတွင် ပါဝင်ဆင်နွဲနိုင်ရေးအတွက် အလေ့အကျင့် ဖြစ်စေရန် စသော ရည်ရွယ်ချက်တို့ဖြင့် ပြုလုပ်ရခြင်း ဖြစ်သည်။ စာတမ်းများ ကို မျှော်လင့်ထားသည်ထက်ပင် ပိုမို၍ လက်ခံရရှိခဲ့သည်။
ဘာသာရေး၊ ပညာရေး၊ သာသနာရေး၊ လောကရေး၊ လူမှုရေး စသော ရှု့ထောင့်မျိုးစုံမှ စာတမ်းများစွာကို တက်ကြွစွာ ရေးသားကြသဖြင့် အထူးပင် ၀မ်းမြောက်ရပေသည်။ မြန်မာဘာသာ သီးသန့်ဖြင့်သာ ရေးသားကြရန် ကြိုတင် နှိုးဆော်ထားသဖြင့် ရောက်ရှိလာသော အင်္ဂလိပ် စာတမ်းတစ်စောင်ကို ၀မ်းနဲစွာ ချန်လပ်ထားခဲ့ပါသည်။
ဤစာတမ်းများသည် သောတုဇနစာသင်သားများ ရေးသားကြသော စာတမ်းများ ဖြစ်၍ ပညာရှင်တို့၏ စာတမ်းများနှင့် ယှဉ်နှိုင်းကာ မဖတ်စေလိုပါ။ ကြိုးစားကာ ရေးသားကြသော်လည်း လိုအပ်ချက်များစွာ ရှိနေပါသည်။ ယင်းစာတမ်းများထဲမှ နှစ်သစ်ရာ တစ်ခုခုကို ထုတ်ယူပြီး မိမိတို့၏ လက်တွေ့ဘ၀ထဲတွင် အသုံးချနိုင်ပါက ဤစာအုပ် ဖြန့်ဝေရကျိုး နပ်ပေပြီဟု ယူဆမိပါသည်။
ဤဗာရာဏသီ စာတမ်းဖတ်ပွဲ ဖြစ်မြောက်ရေးအတွက် အဘက်ဘက်မှ ကူညီပေးကြသော အရှင်ကုသုမ (အတွင်းရေးမှုး)၊ အရှင်မဏ္ဍလ(ဘဏ္ဍာရေးမှုး)၊ အရှင်အာစိဏ္ဏ(ပြန့်ကြားရေးမှုး)၊ အရှင်စရဏာလင်္ကာရ(စာရင်းစစ်) တို့အားလည်းကောင်း၊ စာတမ်းများ တက်ကြွစွာ ရေးသာပေးပို့ကြသော စာတမ်းရှင်များအားလည်းကောင်း၊ စေတနာ သဒ္ဓါ ထက်သန်စွာ လှူဒါန်းကြသော အလှူရှင်များအားလည်းကောင်း၊ ဝေယျာဝစ္စ ဆောင်ရွက်ကြသူတို့အားလည်ကောင်း အထူးပင် ကျေးဇူးတင်ရှိပါကြောင်း မှတ်တမ်းတင် ဂုဏ်ပြုပါသည်။
“ပရိယတ္တိမူလကံ သာသနံ”
“သာသနာတော်၏ အခြေခံသည် ပရိယတ္တိဖြစ်၏”
ပရိယတ်သာသနာ ကြာရှည်ခိုင်ခံ့စွာ တည်တန့်နိုင်ပါစေ…
အရှင်နိပုဏာလင်္ကာရ (ဥက္ကဋ္ဌ)
စာတမ်းဖတ်ပွဲဖြစ်မြောက်ရေးကော်မတီအဖွဲ့
ဗာရာဏသီ၊ အိန္ဒိယ။
No comments:
Post a Comment