စာပေသည် ရသစာပေ၊ သုတစာပေဟု နှစ်မျိုးရှိပေ၏။ ထိုတွင် သုတစာပေကို ဖတ်ရှုခြင်းဖြင့် ဘ၀အတွက် ဆောင်ရန်၊ ရှောင်ရန် စသည့် ဗဟုဿုတများစွာ ရရှိပေသည်။ ရသစာပေ၏ အရသာကို စာပေကို စွဲမက်စွာ ဖတ်ကြသူတိုင်း ခံစားဘူးကြမည် ထင်သည်။ တစ်ချို့ စာရေးဆရာတို့၏ ရသစာပေ အရေးအသားမှာ ဖတ်ပြီးတိုင်း တစ်ခေါက်ပြီး တစ်ခေါက် ထပ်ဖတ် ချင်လောက်အောင် ပြောင်မြောက်လှသည်။ အမြဲသိမ်းထားချင် လောက်အောင် ဆွဲဆောင်မှုရှိပေ၏။ မိမိအနေဖြင့်မူ သုတစာပေနှင့် စာလျင် ရသစာပေကို ပိုမိုနှစ်သစ်သည်။
မိမိသည် ငယ်ရွယ်စဉ် အရွယ်ကတဲက စာဖတ်ခြင်းကို အနဲငယ် စိတ်ဝင်စားခဲ့ သည်။ လေးတန်းကျောင်းသား အရွယ်က သတင်းစာတို့ကို ခုံမင်စွာ ဖတ်ဖြစ်သည်၊ အမြဲ စောင့်ဖတ်ခဲ့ရသည့်သတင်းတို့မှာ အီရန်-အီရတ် စစ်ပွဲသတင်းနှင့် သီရိလင်္ကာ အစိုးရနှင့် တမီးလ်ကျားသူပုန် စစ်ပွဲသတင်းတို့ဖြစ်သည်။ ထိုမှတဆင့် ကာတွန်း၊ အချစ်ဝတ္ထု၊ တက်ကျမ်းစာပေ၊ ဘာသာရေး စာပေတို့ကို အဆင့်ဆင့် တက်လာခဲ့သည်။ စာသင်သားဘ၀က နှစ်သစ်သော စာပေတို့ကို ၀ယ်ယူဖတ်ရှုပြီး စုစည်းခဲ့သည်မှာ သေတ္တာနှစ်လုံးတော့ ပြည့်ခဲ့သည်။ ခုချိန် ထိုစာအုပ်များ ဖခင်ကြီး၏ နေအိမ်တွင် ပတ်ဝန်းကျင် စာဖတ်သူတို့ကို အကျိုးပြုလျက်ရှိသည်။
ယခုတော့ မိမိသည် ပညာသင်ဟူသော အကြောင်းပြလှလှလေးဖြင့် အိန္ဒိယသို့ ရောက်ရှိနေလေသည်။ ဒီရောက်တော့ ဖတ်စရာ စာအုပ်များ နဲသွားခဲ့သည်။ အလွယ်တကူ ရနိုင်သော အင်္ဂလိပ် စာအုပ်များသည်ကား မိမိအတွက် လက်လှမ်းမမှီ၊ အင်တာနက်မှ စာအုပ်များ ဒေါင်းလွတ်ဆွဲကာ ဖတ်ဖြစ်သော်လည်း ကွန်ပျူတာမို့ ကြာလာလျင် မျက်လုံးညောင်းလှသည်။ စိတ်တိုင်းကျ မဖတ်နိုင်၊ ထို့ကြောင့် စာဖတ်နဲသွားသည်။ ခုတော့ ဆရာကြီးလေသံဖြင့် ပြောရလျင် ပေါင်းသင်းဆက်ဆံရသူ လူတို့၏ မျက်နှာကို ကြည့်ကာသာ ဖတ်ဖြစ်တော့သည်။
အင်တာနက်ကွန်နက်ရှင်း ကောင်းသည့် တက္ကသိုလ်အဆောင်တွင် နေထိုင်သည့် အခိုက် ဘလော့လေး တစ်ခု လုပ်ဖြစ်သည်။ ဖတ်ဖြစ်သည့် စာပေတို့အနက် မိမိနှစ်သစ်သော စာပေတို့ကို စာချစ်သူ မိတ်ဆွေတို့အား ဝေမျှလိုသော ဆန္ဒဖြင့် ဖန်တီးခြင်းဖြစ်သည်။ မှတ်စုတစ်ခု ဖြစ်စေရန် ရည်သန်လျက် ဘလော့ဂ် ဖွင့်ဖြစ်ခဲ့ခြင်းဖြစ်သည်။ အရင်က မှတ်တမ်းရေးလေ့ရှိသော်လည်း နောက်တော့ မရေးဖြစ်ခဲ့၊ မှတ်တမ်းစာအုပ်အစား မိမိဘလော့ဂ်တွင်သာ နှစ်သစ်သော စာပေတို့ကို ကော်ပီလုပ်ကာ တင်ပေးခြင်း၊ မိမိအကြောင်းမှတ်တမ်းတို့ကို ဖွင့်ဟ ရေးသားခြင်းတို့ဖြင့် တင်ဖြစ်ခဲ့သည်။
ဘလော့ဂ်၏ အမည်ကို စီးဆင်းရင်ခွင်ဟု ပေးခဲ့သည်။ မိမိ တွေးဖြစ်ခဲ့သည် အဓိပ္ပါယ်မှာ မိမိ၏ ရင်ခွင်မှ စီးဆင်းလာသည့် စာပေများကို တင်ထားခြင်းဖြစ်၍ စီးဆင်းရင်ခွင်ဟု အမည်ပေးခြင်းဖြစ်သည်။ ထိုကြောင့် မိမိရေးသည့် စာပေတို့သာမကဘဲ မိမိနှစ်သစ်သည့် တစ်ခြား စာရေးဆရာတို့၏ စာပေတို့ကိုလည်း တင်ဖြစ်ခဲ့သည်။ ပို့စ်အားလုံး မိမိနှစ်သစ်သော စာပေတို့ကို တင်ထားခြင်းဖြစ်၍ ဘလော့ဂ်ဖွင့်ဖြစ်တိုင်း မှတ်တမ်းစာအုပ် တစ်အုပ်ကို ပြန်ဖတ်ရသကဲ့သို့ ကျေနပ်မှုတစ်ခုတော့ ရသည်။
စာပေတို့ကို ရေးသာရာတွင် မိမိ၏အမည်ကို သိမ်မွေ့ဦး (၀ါ) သိမ်မွေ့အရှင် ဟု ကလောင်တပ်ခဲ့သည်။ ဆရာ မှည့်ပေးခဲ့သည် မိမိအမည်မှာ နိပုဏ ဖြစ်သည်။ နိပုဏ(ဦး) ၊နိပုဏ( အရှင်) ဟူသည် အဓိပ္ပါယ်အားဖြင့် သ်ိမ်မွေ့ဦး (၀ါ) သိမ်မွေ့အရှင်ဟု သဘော ရလေသည်။ ထိုကြောင့် ယင်းကဲ့သို့ ကလောင်ယူခဲ့ခြင်းဖြစ်သည်။
မိမိနှင့် ရင်းနှီးသူ အချို့က ကလောင်အမည်နှင့် ဘလော့ဂ်အမည် မှာ နုလွန်းသည်၊ မိန်းမဆန်သည်ဟု အပြုသဘောအားဖြင့် ထောက်ပြကြသည်။ သူတို့၏ စေတနာကို နားလည်အသိအမှတ်ပြုသော်လည်း နှစ်သစ်မိသည့် နာမည်မို့ မပြောင်းလဲချင်တော့။ ထိုကြောင့် ယင်းနာမည်တို့ဖြင့်သာ ဆက်လက်ရေးဖြစ်ခဲ့သည်။
ဘလော့ဂ်လေးဖြင့် ဆက်လက်ရှင်သန်နေစဉ် မလေးရှားရှောက် မောင်(စွယ်စုံ ကျမ်း)နှင့် သူငယ်ချင်းများက မိမိ၏ဘလော့အား ဒိုမိန်းသုံးနှစ်စာ လှူချင်လို့ဟုဆိုကာ ဆက်သွယ်လာကြသည်။ မိမိအနေနှင့် မောင်(စွယ်စုံကျမ်း)နှင့် သူငယ်ချင်းကို မသိသကဲ့သို့ မည်သည့်အရာကို ဒိုမိန်းဟု သုံးစွဲသည်ကို နားမလည်ခဲ့ပေ။ သူတို့ ရှင်းပြမှ နားလည်ရတော့သည်။ စေတနာဖြူလှသော သူတို့၏ ဓမ္မအလှူကို ကြည်ဖြူစွာ မိမိလက်ခံခဲ့သည်။
မလေးရောက် မောင်(စွယ်စုံကျမ်း)နှင့် မိတ်ဆွေများ ချွေနှဲစာလေးဖြင့် စုဆောင်းကာ လှူဖြစ်သည့် ဒိုမိန်းအလှူသည် မိမိတစ်ပါးထဲတော့ မဟုတ်ပေ၊ မိမိအပါအ၀င် ဓမ္မ၀က်ဆိုက် ဆယ်ခု ဖြစ်ပေ၏။ လှူမည့် လှူတော့လည်း ငါးနှစ်စာ လှူဒါန်းပေ၏။ ပြည်ပရောက်နေသော်လည်း ဘာသာသွေးမအေးကြသည့် သူတို့၏ ဒိုမိန်းအလှူအတွက် လှိုက်လှဲကျေနပ်စွာ သာဓုခေါ်ဖြစ်ခဲ့သည်။ ဒုတိယအကြိမ် ထပ်မံ၍ ဒိုမိန်းငါးခု လှူဒါန်းသည်ကို သိရသဖြင့် မုဒိတာပွားခဲ့ရသည်။
ယခုတော့ မလေးရောက် ရွှေမြန်မာတို့၏ ကောင်းမှုကြောင့် မှတ်စုလေး တစ်ခုမျှသာ ဖြစ်သော မိမိဘလော့ဂ်လေးသည် ၀က်ဆိုက်တစ်ခု အဖြစ် ပြောင်းလဲခဲ့လေပြီ။ မရည်ရွယ်ဘဲ ကြီးကျယ်မှုလေး တစ်ခုအဖြစ် အင်တာနက်ရင်ပြင်တွင် မြင့်တွေ့နေရပေပြီ။ မိမိအနေနှင့်လည်း ရင်ခွင်မှ စီးဆင်းကျလာသည့် စာပေတို့ကို ထပ်မံ တင်ဖြစ်အုံးမည်ဖြစ်သည်။ ထိုစာပေများမှ စာလေးတစ်ကြောင်းမျှလောက်သည် စာဖတ်သူ များကို ကျေးဇူးပြုပါစေသတည်း။ ဤသည်မှာ မိမိ၏ အလွန်ထက်သန်သော အာသီသပင်ဖြစ်တော့သည်။
သိမ်မွေ့ဦး (BHU)
(07-02-2013)
No comments:
Post a Comment