လူမှန် နေရာမှန်

ငယ်ရွယ်တုံး အဆော့ကုန်အောင်ဆော့ရတယ်၊ ဒီလိုမဟုတ်ဘဲ ကြီးမှ ဆော့ရင်တော့ ရဲ အဖမ်းခံရတတ်တယ်…။

         ဆရာကြီး အောင်သင်း ပြောခဲ့ဘူးသော စကားဖြစ်မည်ထင်သည်။ မိန့်ခဲ့ဘူးသော ပညာရှင် အမည်ကို အတိအကျ မမှတ်မိတော့ပါ။ ယင်းကဲ့သို့ အဓိပ္ပါယ်တူသော စကားကို မှတ်မိနေပေ၏။  

         ဆိုလိုရင်းမှာ- ငယ်စဉ်ကလေးဘ၀က ကစားနည်းမျိုးစုံတို့ကို မျောက်ရှုံးအောင် ကစားသော်လည်း မည်သူမျှ အပြစ်မမြင်ကြပါ။ ကလေးပဲ ဆော့မှာပေါ့ ဟု နားလည်ခွင့်လွှတ်ပေး ကြသည်။ ဆော့ရင်း ပြစ်မှုတစ်ခု ကျူးလွန်မိခဲ့ပါက ကလေး ဟူသော အသိဖြင့် လျှော့ပေါ့ စဉ်းစားပေး ကြပေသည်။ 
    
     အသက်အရွယ် ကြီးရင့်လာပါက ကစားနည်းမျိုးစုံတို့ကို ကလေးဘ၀ကကဲ့သို့ စိတ်တိုင်းကျ ကစားလို့မရတော့ပေ။ ကလေးဘ၀ကလို သွားဆော့မိပါက ဒီအရွယ်ကြီးရောက်နေတာတောင် ရူးနေတုံးဟု ထောမနာပြုကြပေမည်။ မိမိကိုယ်ကို မထိန်းသိမ်းနိုင်ဘဲ ပြစ်မှု မကင်းသော ဆော့ခြင်း ကို ဆော့မိပါက ရဲ အဖမ်းခံရပေမည်။ အကျိုးဆက်အဖြစ် အများတကာ ကဲ့ရဲ့ခံရပြီး ထောင်နန်းစံရပေမည်။

     ဒီရက်ပိုင်းအတွင်း ကျွန်ုပ်၏အဖြစ်နှင့် ကိုက်ညီနေသဖြင့် အထက်ပါစကားလေးကို မကြာခဏ သတိရနေမိသည်။ သတိရမိခြင်းနှင့်အတူ မိမိကိုယ်ကို ရှက်ရွှံ့သလို ခံစားနေမိသည်။

            ကျွန်ုပ်သည်ကိုရင်ဘ၀ကတဲကဘောလုံးကစားခြင်းကိုအထူးနှစ်သစ်သည်။ သို့သော် ဘောလုံးကို

 ဖြစ်ဖြစ်မြောက်မြောက် ကျွမ်းကျွမ်းကျင်းကျင် မကစားတတ်ပေ။ ထို့ကြောင့် ကစားကြသည့်အခါ အသင်းလူခွဲပါက ကျွန်ုပ်ကို ခေါ်ချင်သည့် အသင်းမရှိတတ်ပေ။ ယင်းကဲ့သို့ ဘောလုံးကစားခြင်းဝယ် ပါရမီမြောက် ထူးချွန်သူလည်း ဖြစ်သည်။
 

       ကျွန်ုပ် ဘောလုံးပွဲ စကြည့်တတ်ခါစက မန်ယူတွင် အန်ဒီကိုးလ်၊ ဒွိုက်ယော့ခ် ဂမဲ နှစ်ကောင်တို့ အစွမ်းပြနေချိန်ဖြစ်သည်။ ပေါစခိုးလ် ၏ တိကျသော အပြင်းကန်သွင်းချက်၊ ဂစ်၏ အလိမ် အခေါက်နှင့် ဖြတ်တင်ဘော၊ နောက်ချန်တိုက်စစ်မှုး ဆိုးရှားလ် ၏ ဂိုးသွင်းဟန်တို့ကို ကျွန်ုပ် စွဲမက်ခဲ့သည်။ 

     ဘက်ခမ်း၏ ဖရီးကစ်၊ တိကျသော ဖြတ်တင်ဘောနှင့် ကောက်စား နွားကြီး နစ္စတယ်ရွိုင်း၏ ခေါင်းတိုက် ဂိုးသွင်းဟန်၊ ရွိုင်ကိန်း၏ ဘောလုံးဖြန့်ဝေမှု၊ ရှမိုက်ကယ်၏ ဂိုးပေါက် လုံခြုံမှု၊ မန်နေဂျာ ဖာဂီ၏ စိတ်ဓာတ်မြှင့်တင်မှု စသည့် ပဉ္စလက်စွမ်းရည်တို့ကြောင့် ကျွန်ုပ်မှာ မန်ယူမှ မန်ယူ ဖြစ်ခဲ့တော့သည်။ မန်ယူကို ထိလျှင် လုံးလုံးမကြိုက်၊ အသားထိသည်ထက်ပင် ပို၍ နာတတ်ခဲ့သေးသည်။ ဘောလုံးကို ရှုးသွပ်ခဲ့ရာ ငယ်စဉ်တုံးက ခံစားချက်ကလေး တို့ပင်ဖြစ်၏။

      ယခုတော့ ဤမျှလောက် အသင်းစွဲစိတ် မပြင်းထန်တော့ပြီ။ ကိုယ်အားပေးသော အသင်း ကစားပုံကောင်းလျှင် ချီးမွမ်းမိသကဲ့သို့ အသင်းကစားပုံ ညံ့လျှင်လည်း မှန်ကန်စွာ ဝေဖန်တတ်ခဲ့ပြီ။ သို့သော် မန်ယူပွဲ လာလျှင် တီဗွီက ကြည့်ဖြစ်နေသေး၏။ ငယ်ငယ်က အကြောင်းသိ သူငယ်ချင်းများ ကတော့ ဘောလုံးပွဲ ကြည့်ပုံ ရင့်ကျက်လာပြီဟု ကြံဖန်ကာ ပြောကြသေး၏။

      ဘ၀၏ ဆယ်စုနှစ် သုံးခု ပြည့်ခါနီးမှ ပညာသင် ကျောင်းသားကြီးဘ၀ဖြင့် အိန္ဒိယ သို့ ရောက်လာခဲ့သည်။ တက္ကသိုလ်ရောက်တော့ ကျောင်းသားဟူသောအသိဖြင့် ပျော်ရွှင်စွာ နေလာ ခဲ့ပြန်၏။ တက္ကသိုလ်အတွင်း စိမ်းစိမ်းစိုစို ဘောလုံးကွင်းတွေကလည်း ဆယ်ကွင်းထက်မနဲ၊ တစ်သက်နှင့်တစ်ကိုယ် တစ်ခါမှ မကန်ဘူးသောဘောလုံးကွင်းများက ဆီးကြိုနေသဖြင့် ကိန်းအောင်းနေသော ရွှပိုး ဓာတ်ခံများက ထကြွလေတော့၏။

     ကန်လို့ မသင့်တော်ပါဘူးလေဟူသော အသိဖြင့် ထိန်းချုပ်လေသော်လည်း ညနေပိုင်း ရောက်လျှင် အဆောင် အတူနေ ကျောင်းသား သူငယ်ချင်းများက ကစားဖို့ လာခေါ်ကြပြီ။ ထိုသို့ခေါ်လျှင် ကျွန်ုပ်ကို နှစ်ခါ မခေါ်ရပြီ။ ခိုက်ခိုက်တုန်အောင် အေးနေသော ရာသီဥတုဒဏ် ခံနိုင်ရန်ဟူသော အကြောင်းပြချက်ဖြင့် ကျွန်ုပ် လိုက်ပါသွားတော့သည်။ ဘောကန်ဖိနပ် အသစ်တစ်ရံကို စီးရင်း အပျော်တန်း ဘောလုံးသမားကြီး လုပ်ခဲ့တော့၏။
 

      တစ်ခါတစ်ရံ ရှုနီ,၀ဲလ်ဘတ်တို့လို ရှေ့တန်း၊ တစ်ခါတစ်ရံ နာနီ, ကားရစ်တို့လို အလယ်တန်း၊ တစ်ခါတစ်ရံ ဖာဒီနန်,အီဗရာတို့လို့ ခံစစ်တံတိုင်းကြီး လုပ်ခဲ့၏။ ဂိုးသမား မရှိခဲ့လျှင်လည်း ဗန်ဒါဆားလို အသက်ကြီးမှ လက်စွမ်းပြ ရသေး၏။ ယင်းကဲ့သို့ နေရာစုံ အများ မကစားချင်သော နေရာတိုင်း ကစားပေးမှုတို့ကြောင့် ညနေကစားချိန်ရောက်လျှင် မရှိမဖြစ် လိုအပ်သော ပလေယာ တစ်ယောက် ဖြစ်လေတော့သည်။ နောက်တန်းကစားစဉ် ကိုယ့်ဂိုးကိုယ် သွင်းခဲ့သည့်ဂိုးအရေအတွက် မှာလည်း တော်တော်လေး များခဲ့လေပြီ။

      ယင်းကဲ့သို့ ကစားသည့်နှစ်တွေ များလာခဲ့သော်လည်း ထိခိုက်ဒဏ်ရာရမှု ကြီးကြီးမားမား မဖြစ်ခဲ့ဘူးပေ။ ကစားခြင်းကြောင့် မိတ်ဆွေ များခြင်း၊ အချင်းချင်း ညီညွတ်ခြင်း၊ ကျမ္မားရေးအတွက် အထောက်အကူဖြစ်ခြင်း စသည့် အကျိုးများစွာ ရရှိပေသည်။ ထိုကြောင့် ဘောလုံးကစားခြင်းသည် လူငယ်များအတွက် အထူးသင့်လျှော်သော ကစားနည်းဟု ထင်မြင်မိသည်။

      တစ်ရက်တွင် ထုံးစံအတိုင်း ကျွန်ုပ် အပေါင်းအသင်းများနှင့် စုကာ ဘောလုံး ကစားခဲ့သည်။ ပွဲစခါစဖြစ်၍ သွေးအေးနေသေးသောကြောင့် ရှေ့တန်းတက်ကာ ကစားချင်စိတ် မရှိသေးပေ။ ထိုကြောင့် ဂိုးသမားလုပ်ခဲ့သည်။ ကစားပြီး ( ၁၀ ) မိနစ်လောက်အကြာတွင် ကစားဖော်တစ်ယောက်၏ ကစ်ချက်ပြင်းပြင်း ကန်သွင်းမှုသည် အဆင်သင့်မဖြစ်သေးသော ကျွန်ုပ်၏ ဘယ်ဘက်လက်ကိုထိမှန်ခဲ့သည်။ ဒရော့ဘာ ကစ်ချက်ကဲ့သို ပြင်းထန်ပါပေသည်။ ကျွန်ုပ်၏ ဘယ်ဘက်လက် အရိုးတစ်ချောင်း ထက်ပိုင်း ကျိုးသွားခဲ့တော့သည်။

         ဖြစ်လျှင်ဖြစ်ခြင်း တက္ကသိုလ်ဆေးရုံကို သွားပြကြသည်။ လူဦးရေ ပေါများသော ကုလားနိုင်ငံဖြစ်၍ လူနာများ များပြားလှသည်။ ကျောင်းသားဟု အထူးဦးစားပေးကာ ဓာတ်မှန်ရိုက်ခြင်း ကျောက်ပတ်တီး စည်းခြင်း တို့ကို ပြုလုပ်ပေးသည်။ ဦးစားပေးဖြစ်သော ကြောင့် လေးနာရီခန့် စောင့်ခဲ့ရသည်။ အရေးပေါ်လူနာဆိုလျှင် မကုသခင်ကတဲက အသက်ထွတ်လောက်ပေပြီ။ ကျောက်ပတ်တီးစည်းအပြီးတွင် ဓာတ်မှန်ရိုက်ပြီး စစ်ဆေး ကြည့်ရာ လက်ရိုးမတည့်သေးဟု အဖြေထွတ်သည်။ တာဝန်ကျ သင်တန်းဆင်း ဆရာဝန် ကလေးက ပြဿနာမရှိဟု ပြောသဖြင့် ယင်းအတိုင်းထားခါ ပြန်ခဲ့သည်။

      နှစ်ရက်နေပြီး တက္ကသိုလ်ဆေးရုံကို စိတ်မချသဖြင့် အပြင် လက်ခ်ချမီး ပုဂ္ဂလိက ဆေးရုံကို သွားပြသည်။ ၄င်း ဆေးရုံဆရာဝန်မှ ကျောက်ပတ်တီးမှန်သည်၊စိတ်မပူပါနဲ့ဟု ပြောကာ သောက်ဆေးပေးပြီး ( ၁၅ ) ရက်ပြီးမှ ပြန်ပြရန် ချိန်းသည်။ ထိုကြောင့် စိတ်အေးစွာ ထားပြီး သောက်ဆေးသောက် ကာ နေခဲ့သည်။

       ( ၁၅ ) ရက်စေ့အပြီး ယင်းပုဂ္ဂလိက ဆေးရုံကို ပြန်ပြရာ၌ လက်ရိုးအနေအထား မမှန်ဟု အဖြေထွတ်သည်။ စောင့်ခဲ့ရသည့် ( ၁၅ ) ရက် အလကားဖြစ်ခဲ့သည်။ ကျောက်ပတ်တီး ပြန်စည်းရန် အတွက် ခွဲစိတ်ခန်း အားလပ်ချိန်စောင့်ရာ တစ်နေကုန် ခဲ့သည်။ ည ( ၉ ) နာရီရောက်မှ ကျောက် ပတ်တီးစည်းရသည်။ လက်အသားထဲ ပိုက်ထိုးကာ တီဗွီဖန်သားပြင်ကို တိုက်ရိုက် ကြည့်ပြီး အရိုးဆက်ခြင်းဖြစ်၍ မှန်ကန်သည်ဟု ဆို၏။

          ပုဂ္ဂလိက ဆေးရုံမို့ တော်တော့သည်။ ခွဲစိတ်ခန်းအတွင်း ညစ်ပတ်သည်မှာ သွေးညှီနံ့များ နံနေ၏။ ခင်းထားသည့် အ၀တ်တို့မှာ သွေးတွေ ပေကျံနေ၏။ ကျောက်ပတ်တီးစည်းအပြီး မေ့ဆေး ထုံဆေးတို့ မပြယ်သေးခင်မှာပင် လူတွဲပြီး ကိုယ့်ဘာသာကို ထကာ လမ်းလျှောက်သွားရသည်။ လူနာလိုက်ပို့သူသာမပါလျှင် လဲကျမည်မှာ သေချာသည်။ ဈေးကတော့ ကောင်းသည်။ ကိုရီးယားက လာသော ကျောက်ပတ်တီးမို့ ဈေးကြီးသည်။ ကျောက်ပတ်တီးစည်းခ ဒေါ်လာ တစ်ရာကုန်ကျသည်။

          ပေးထားသော ဆေးကိုစားပြီး ( ၁၅ ) ရက်စေ့၍ ပြန်ပြရာ တစ်ထောင်ဆစ်အထက် ကျောက်ပတ်တီး အနဲငယ်ကို ဖြတ်ပေးပြီး တစ်လနေမှ ပြန်ပြရန် ချိန်းသည်။ ချိန်းထားသော တစ်လပြည့်၍ ပြန်သွားပြရာ အခြေအနေကောင်းပြီ ဟုပြောပြီး ကျိုးထားသောနေရာအထက်မှ ကျောက်ပတ်တီးကို ဖြတ်ပေး၏။ တစ်ပတ်ပြည့်မှ ကျောက်ပတ်တီးအကုန်ဖြတ်ရမည်ဟု ပြောသည်။ သို့သော် ဓာတ်မှန်အဖြေကို ကြည့်ရသည် မှာ သိပ်အားမရလှပေ။ အခြေအနေမကောင်းလျှင် မြန်မာပြည်ပြန်၍ ကုရမည်လားဟု စဉ်းစားရတော့၏။

     တစ်ပတ်ပြည့်ပြီးသောအခါ ဆရာဝန်က ကျောက်ပတ်တီးအားလုံး ဖြေပေးပြီး “တော်တော်ကောင်းသွားပြီ၊ အားလုံးကောင်းရန် အချိန်ယူရမည်”ဟုပြောကာ အပျော့စား အ၀တ်စပတ်တီး ပေးသည်။ ရေချိုးချိန် စသည်အချိန်တို့တွင် ချွတ်ထားနိုင်ပြီး ပြီးလျှင် ပတ်ထား ရသည်။ သောက်ဆေးများပုံမှန်သောက်နေရပြီး တစ်လပြည့်က ပြန်လည်ပြသရန် မှာထားသည်။

        ခုဆိုလျှင် လက်ကျိုးခဲ့သည်မှာ ( ၃ ) လပြည့်ခဲ့ပေပြီ။ အခြေအနေကောင်းလာ သော်လည်း လုံးဝကြီး ကောင်းမလာသေးပေ။ တစ်ခါတစ်ရံ ကိုက်ခဲနေသေးသည်။ ကောင်းမွန်စွာ လှုပ်ရှားလို့ မရသေးပေ။ ချိန်းထားသော တစ်လမပြည့်သေးသဖြင့် သွားမပြရသေးပေ။ မည်သို့ အဖြေထွတ်မည် ကိုတော့ စောင့်ကြည့်ရပေအုံးမည်။

          ရဟန်းဘ၀ဟူသည် အိနြေ္ဒ သိက္ခာဖြင့် ရင့်ကျက်တည်ငြိမ်စွာ နေထိုင်ရသော ဘ၀ မျိုးဖြစ်သည်။ လူများကဲ့သို့ ပြေးလွှားလှုပ်ရှား၍ နေခြင်းငှါ မသင့်တော်ပေ။ ကိုယ့်နေရာကိုယ် မနေဘဲ နေရာ မှားကာ မျောက်ကဲ့သို့ ခုန်ပေါက်ကာ ကစားခဲ့သည်။ ရရှိလာသော ရလာဒ်က ခုထိ မပြီးသေးပေ။

           အသိမကြွယ် ရှင်ငယ် ဘ၀က ဤကဲ့သို့ ထိခိုက်မှု ဖြစ်ခဲ့လျှင်တော့ နားလည်ပေးနိုင်ကြပေမည်။ ယခု အရွယ်ကား နားလည်ပေးရမည့် အရွယ်လည်း မဟုတ်တော့ပေ။ ထိုကြောင့် ရင်းနှီးသူ အချို့က မေးကြသောအခါ အမှန်ကို အမှန်တိုင်း မဖြေ၀ံ့ပြီ။ ထိခိုက်မှု တစ်ခုကြောင့် လက်ကျိုးသွားသည်ဟုသာ အဖြေကို ရှောင်ကွင်းရင်း မုသားဖြူ သုံးရတော့သည်။

       ခုတော့ ရဟန်းဘ၀နှင့်တူစွာ လူမှန် နေရာမှန်မှာ ကျွန်ုပ် တည်ငြိမ်စွာ နေရလေပြီ၊ ထိန်းသိမ်းစောင့်စည်းလိုသော စိတ်ကြောင့်တော့ မဟုတ်ပေ။ ကစားနိုင်လောက်အောင် မလှုပ်ရှားနိုင်သေး၍ ဖြစ်သည်။ ပြန်ကောင်းလာလျှင်တော့ အတတ်နိုင်ဆုံး မကစားဖြစ်အောင် ထိန်းချုပ် ရအုံးမည်။ စိတ်ဟူသည် အပြောင်းအလှဲ မြန်သည်၊ မကောင်းမှုတွင် ပျော်မွေ့သည်ဟု ဘုရားရှင် မိန့်တော် မူ၏။ ကျွန်ုပ်လည်း ယခုချိန်ထိ မိမိစိတ်ကို ထိန်းချုပ်ရန် ကြိုးစားနေရဆဲပါပေ…။
  

      (ဤစာမူဖြင့် ဝေယျာဝစ္စ၊ အလှူငွေတို့ဖြင့် ကူညီကြသော ဗာရာဏသီ သီတင်းသုံးဖော်တို့အား ကန်တော့ပါသည်။ ) 

 သိမ်မွေ့ဦး ( BHU )